冠軍騎師潘頓停賽六期之後，跑咗兩次賽事，結果都能起孖，剛戰便勝出「總統至上」及「聰敏不凡」，似乎手風好順，但同一時間勁敵雷神亦贏唔停，家陣潘頓落後雷神17場頭馬，衛冕冠軍真係唔樂觀。
其實潘頓有兩大障礙相當之難解決，一係四大馬房三個唔撐潘頓，今季與大摩、蔡約翰零交易，告東尼亦只有「牛精好友」合作一次，得方嘉柏叫做支持潘頓。
第二係潘頓本身體重問題，據知佢停賽復出之後，連120磅都造唔到，所以今期第六場縱使賽前摸實「旅遊名牌」操練及試閘，但結果仍因造磅問題，要讓畀薛寶力騎。試諗吓如果長期係咁，一定損失極多輕磅實力座騎，想再做冠軍無疑凍過水。
今期潘頓可以做嘅，就係力拼胯下每一駒，避免被雷神進一步拋離。其中「十二門徒」近兩仗非冠即亞，正值大熟大勇，今次跑谷草1000米抽個黃金一檔，贏面的確好大！