勝負有時講戰意多於實力，尤其喺盃仔場合；英聯盃，窮盃仔，當然係為名譽而戰，定位清晰，今天藍紅大戰，信利記鬥志較強，值得冷敲。
今屆足總盃因「雙藍」車仔及曼城，主場輸畀低組別球隊，三十二強止步，感覺上好爆；其實喺呢個未計電視直播收益，冠軍只有二百萬英鎊落袋嘅傳統盃賽，英超球隊近年唔算太熱衷。上屆有十隊入到十六強，前屆更只有七隊，今屆如果新特蘭、曼聯及利記重賽贏到波，加埋周一守尾門嘅史篤城掃走羅奇代爾嘅話，最多會有十隊，英超隊算是「正常發揮」。
當然上周五、六爆得甘，可能警醒咗周日另外三支出場嘅英超隊，阿仙奴喺簇新嘅白禮頓美國運通主場，輪換之下仍有大把球星壓陣；見球員喺靚場加歷史性爆滿嘅逾三萬觀眾前，攔截敢吓吓去盡，結果都只係險勝3:2晉級，白禮頓𠵱家仲排緊英冠下游，我諗佢哋呢個靚場幫到唔少技術型嘅客軍。另外，外界唔敢睇好嘅阿士東維拉同韋斯咸，同日都食魚生粥過關；其中維拉今季所有賽事計，都只係第三次喺一場比賽入到兩球，咁啱，三次都係主場贏2:1，班波鋒力係全英各級最弱，佢哋唔理護級，對住英冠一哥般尼茅夫照贏，可能先叫做爆冷。
英超、歐聯，重要性當然遠較足總盃同聯賽盃高。三季前，「常客」利記互射十二碼贏卡城，攞咗球會史上第八次英聯盃，冠軍獎金十萬鎊（電視直播，每場可多收十多萬鎊）咁大把；同季，車仔在歐聯決賽同樣用十二碼射贏拜仁，冠軍獎金埋單計達四千二百萬鎊。車仔上周六喺足總盃主場負英甲巴拉福特2:4，賽前當然冇得估；不過摩佬上季食回頭草返車仔，未有盃落袋，聯賽有番優勢，跟住又要準備下月中歐聯十六強對法國班霸巴黎聖日耳門，換轉你是摩佬，會為二百萬鎊，替藍戰士追逐多三個月咩？
咁十萬鎊呢？車仔今晚迎紅軍，首回合和1:1，今場一定要分出勝負，贏到嘅三月一日亮相溫布萊決賽；論陣容，車仔上次收起嘅泰利同迪亞高哥斯達，有機會踢番正選，不過後顧鬥曼城嘅聯賽榜首大戰，我唔認為摩佬會下令戰將喺今晚呢個奀盃全力出擊，單W熱到1.47倍，唔值博。
相反，紅迷近日已高舉「將謝四帶到溫布萊」的橫額，希望利記打好聯賽盃及足總盃，殺到入決賽，為大隊長謝拉特離隊前最後一次領紅軍殺入溫布萊打氣。不過利記下半季目標，除咗要爭聯賽前四，續入來屆歐聯搵大錢外，轉戰歐霸盃對手較弱亦係一條出路；如果摩佬徒弟羅渣士要為球隊今屆打底，上次足總盃和保頓時，收起嘅謝四同已復操嘅射手史杜列治，喺今晚英聯盃復出係絕佳時機。
紅軍，從來打戰意波厲害，遇強越強；英聯盃不必太計較人腳逐個秤，今晚可博受讓半/一的下盤，甚至冷客W，博謝四提早圓夢！
文：波神