最近內地不斷爆出儲戶銀行存款莫名蒸發、被銀行「內鬼」冒領等案件，已經令人匪夷所思，而重慶張淨先生的遭遇，已經超出常人的理解程度。張先生喺農行（1288）的存款一百二十萬元人民幣離奇失蹤，佢喺二○○六年控告農行索償，結果反而被公安指「詐騙」，坐監四年，二○一○年先放番出來。直到去年十二月，重慶法院先承認單案係冤案，但筆錢到而家都未攞得番。
二○○一年，有農行職員向張先生拉攬存款，承認給予30%高額年息，仲有齊銀行還款承諾書等文件，又幫佢開戶。存款到期後，張先生先發現原來錢一早俾人轉走咗。張先生同農行交涉數年，已經獲得承諾發還本金，但農行突然走去報案，話張先生詐騙國家資產，最終就唔使找數。
期間，已經七十一歲的張先生被公安多次逼供，在獄中吃盡苦頭自然不在話下。最為離譜的是，真正從事詐騙的農行職員，最後只被判囚一年，而身為苦主的張先生，刑期反而是其四倍。近期發生的多宗銀行存款失蹤事件，其實都與職員違規銷售理財產品有關，一旦有爭坳，銀行方面就唔認數，正正暴露內銀管理漏洞。農行的行為，完全惡晒，難怪內地人一有錢就要向海外轉移資產喇。
李可強