中原地產噚日舉行一年一度周年晚宴，各大地產商嘅銷售部阿頭或者上緊位嘅第二梯隊都有畀面出席，今年跟舊年一樣喺灣仔會展筵開二百二十席，照舊設有服飾大獎，不過認真打扮嘅多數都係中原嘅女經紀。
中原今年以「We are Super Stars」做晚宴主題，服飾大獎以中原薈三個主題顏色，即係銀灰、酒紅同閃金為評核服飾標準。中原創辦人施永青、主席黎明楷同埋亞太區住宅部總裁陳永傑身為主人家，當然以最標準嘅服飾示人喇，佢三位噚日企埋一齊即刻比較吓邊個最弗，施永青仲疑似縮肚腩。
晚宴六點半開波，新鴻基地產（016）樓神雷霆就姍姍來遲，接近九點先至匆匆趕到，逗留大約半粒鐘鬆人。
