陳啟宗旗下恒隆地產（101）與恒隆集團（010）噚日除咗公佈業績，仲宣佈有董事退任，不過今次唔係話有邊位執行董事唔撈咁嚴重，只係殷尚賢同鄭漢鈞呢兩位八十幾歲嘅獨董話今年四月開股東會時唔再重選嘞，想放多啲時間做私人嘢。
八十三歲嘅殷尚賢其實係恒隆老臣子，一九七○年已經加入恒隆，曾經做到去董事總經理，一九九二年退任後轉做獨董兼副董事長，留喺恒隆足足有四十五年。八十六歲嘅鄭漢鈞做恒隆董事，都有廿二年。
查實恒隆地產嘅獨董真係好長情，位位都做咗好多年，港交所（388）前主席夏佳理就由一九八○年開始為恒隆做獨董，至今講緊三十五個寒暑。「年資」較短嘅都有七年，就係二○○八年先至加入做獨董嘅畢馬威中國及香港前主席何潮輝。不過話時話，做咁多年，其實仲夠唔夠獨立呢？