年僅二十歲嘅日本男星山崎賢人，上年開始冒起成為圈中搶手貨，拍完多齣偶像劇同埋電影後，令佢人氣直逼另一當紮型男福士蒼汰，更被行內人睇好今年會爆紅。
喺日本做偶像離唔開露肉，山崎賢人都唔例外，除咗喺偶像劇《水球Yankees》度只係着住泳褲仔演出外，佢先後推出過兩本寫真集都以肉男姿態冧女，當地妹妹仔自然封佢做男神，踏入新一年已經片約、劇集接住上。
山崎賢人唔止要為NHK新劇擔任男主角，原來佢仲有份參演今年夏天開畫嘅青春片《女主角失格》，拍住日劇小花桐谷美玲、人氣男模坂口健太郎上演三角關係。呢齣新戲翻拍自幸田桃子創作嘅少女漫畫，桐谷美玲暗戀青梅竹馬嘅山崎賢人，一直以為自己係愛情故事嘅女主角，點知係佢諗多咗，桐谷會忠於原著挑戰主角嘅騎呢表情，即管放長雙眼睇吓山崎賢人係咪可以紅遍影視界。
撰文：壇墨