今期賭外檔馬等於同錢鬥氣!

今期賭外檔馬
等於同錢鬥氣!

今個禮拜三谷草賽事,用最狹窄之C加3欄,睇番上季同期1月22日,亦曾用呢條移欄作賽,當晚頭馬最外都係排八檔,而十檔或以外馬更未嘗入Q,可見外檔馬好難跑。
至於跑法方面,過半數頭馬守二至四位下入直路建功,不過後上馬並唔係冇得追,好似「珍珠有利」、「遊俠兒」及「興趣」只要彎位緊守內叠不蝕腳程,最終便憑後勁制勝。
今戰列陣馬中,第三場「高山威龍」贏過兩次谷草C加3欄,亦係全場唯一贏過呢條跑道嘅參戰馬,抽埋二檔好位,有力贏得今季第二win。另外,第五場「百戰百勝」兩次角逐谷草C加3欄均不勝有位,窄場性能唔使懷疑,排三檔可在早段守內叠留力,末段只要及早望空,隨時可以推翻大局。