【壹週刊】近月網上瘋傳一張圖，上面有個又戴帽，又戴黑超嘅中女，舉起V字手勢，側邊寫住「心思思，有件事，遇疑難，話我知」、「人生苦短，歲月葱葱，眾裡尋他，緣來福至」，原來係婚姻介紹所廣告。
網民見圖後瘋狂留言，笑到喊晒，一時話個女人似詹瑞文，一時又話似魯振順，仲有人話︰「第一次咁有衝動想參加speed dating ！」
見網民反應咁熱烈，一於帶大家去睇下咩料。一去到，見到門口掛咗塊白色布簾，神神秘秘咁款，揭開塊布行入去，周圍都係五顏六色嘅燈光，睇到眼都花，勁似跳茶舞嘅環境。
老闆娘朱太見有人上門，即刻上前狂sell，「只要香港身份證登記就得，登記費＄150，之後睇相揀對象，另收＄250。我亦可以幫你哋安排晚餐，好多會員爭住去㗎，＄300包食、包唱歌，邊度有呀？」
見記者倒抽一口涼氣，朱太加多兩錢肉緊話︰「如果啱嘅，就可以喺呢度後面拉埋簾傾偈，轉個暗啲嘅燈俾你哋，俾啲瓜子、糕點你哋，咁我就喺門口等，啱嘅你哋咪自己聯絡囉。」
她再補充︰「我哋有好多女會員，最多係四十幾歲，嚟咗香港幾年嘅新移民女人。嫁咗嚟香港，攞咗身份證，唔鍾意個老公咪離婚囉。」如果成功結婚，朱太話男女每人要額外收＄5000媒人利是，合共$10,000。
記者問她點知客人成功結婚，她胸有成竹咁話：「(登記結婚者名稱會在)婚姻註冊處門外會貼出來，十四日內冇人反對先結得，我哋有工友喺入面做嘢。」
iPhone版下載：
http://goo.gl/1SDaWF
Android版下載：
http://goo.gl/xfQS8D
壹週Plus網頁
http://nextplus.nextmedia.com/