台灣上周舉行世界自由日慶祝大會，白鴿黨主席劉慧卿拍住黨友黃碧雲，齊齊喺周四晚出發參加。原來佢哋兩個係獲邀喺大會上發言，講啲乜？之唔係去年底喺香港持續咗七十九日雨傘運動囉。由於當地之前都有太陽花學運，唔少人聽得幾有共鳴。卿姐話佢其實係藉雨傘運動，講吓公民社會同社交網絡嘅發展，點樣配合新世代運動。
原來台灣立法院副院長洪秀柱喺大會舉行期間，宴請出席大會嘅各國代表，卿姐同碧雲着到一紅一綠去捧場，仲拉住洪秀柱一齊合照。卿姐對於洪秀柱話，立法院三分之一委員都係女性，不知幾咁羨慕，強調香港喺呢方面，認真要向台灣學習。