【壹週刊】當沙田廣源邨公屋癲到呎價過萬時，沙田愉翠苑都成為新界居屋王，年初時三房套房單位、實用面積得六百五十呎，就以六百五十五萬在自由市場成交，呎價都係萬萬聲。 今期業主家住愉翠苑，當公屋、居屋都成為豪宅，不如豁出去當私樓設計，揼七十萬裝身，縱然無會所無景觀，但入到屋有靚裝，話之佢係私樓定居屋。
香港樓價癲貴，辛辛苦苦終能上車，幾大都要住得舒服。業主開宗明義要設計令家人住得開心，但面積八百呎，實際得六百多呎的單位，想偷位增加空間，令一家四口住得闊落有難度，方法之一是靠用色、整齊，令人看得順眼，保持心情愉快。
設計師用色大膽，但又不能亂來，顏色協調不好，變成小朋友屋就出事。客廳最搶眼，用了粉藍色牆，配鮮黃色牛皮梳化及淺草綠地氈，夠晒有性格，「客廳要光猛，用淺色帶柔和色最啱，其實梳化用最穩陣的黑、啡都得，但鮮色好玩啲。」加埋綠色及咖啡色亞加力餐椅，感覺又幾潮。
最破格是大門旁的開放式廚房，紫色玻璃牆相對時下興用黑、白、灰不銹鋼冷色tone更有睇頭，「玻璃牆身易清潔兼無接口，望落都清新啲。」還有一入屋就見到的紅磚牆，有色有手感，啱晒屋主想與別不同的要求。
兩間仔女房都沿用呢條顏色橋，用他們自選的色彩來包裝，反而主人房卻用白色，何解？「大人同小孩的心境不同，大人想在寧靜的環境入睡，但套房的廁所都係藍藍哋色。」設計師果然有求必應，又係嘅，最緊要係戶主與屋企人住得舒服嘛。
揀啱顏色後，設計師亦因為客廳空間屬長窄形，索性不做電視櫃，又在客廳做了隱形門，然後拉成一直線，減少混亂又令視覺更寬敞；為令樓底看似更高，燈槽及盒仔燈都用不了，只是以三個燈陣照明，好睇好用。
至於所有人都煩惱的儲物位，設計師都算物盡其用，讀中一的女兒房間，已將床下升高床底可儲物，主人房起地台更是常識。咦，主人房仲用到盡，要一分為二？一半是書房、一半放睡床，中間以風琴簾分隔。唉，無法啦，香港地少人多，樓價癲，唔算到盡點樣生存？
iPhone版下載：
http://goo.gl/1SDaWF
Android版下載：
http://goo.gl/xfQS8D
壹週Plus網頁
http://nextplus.nextmedia.com/