出名好打得嘅政務司司長林鄭月娥在任發展局局長嘅時候，推出活化工廈政策，話要鼓勵藝術團體租用工廈，推動創意產業。過去幾年都有唔少工廈成功改裝或重建，但就好少見林太出席開幕禮。
噚日私人發展商協成行成功活化黃竹坑一幢工廈，除咗出租搵錢，仲攞咗約兩萬呎樓面面積，以優惠租金租畀年輕藝術家、青年創業，開幕禮竟然請到林太出席，仲有行會成員陳智思，但就唔見坐正嘅發展局局長陳茂波。點解林鄭現身商業項目嘅落成開幕禮？佢致辭時自行解謎，話自己同成個特區政府，一向成為呢類活動稀客：「原因心中有數，都係嗰四個字！」
究竟係邊四個字？答案唔通係官商……算啦，同佢之前拋過嘅四字詞一樣，「不言而喻」啦。佢強調今次咁成功，真係好高興。