馬會今年都幾畀面渣馬，有三人參與領袖盃，包括副主席周永健、大董鄭維志同埋行政總裁（CEO）應家柏，應家柏都唔係第一年落場，不過今年成績最好，以九分廿七秒，同美國總商會前主席詹康信一齊獲得季軍。
話時話，應家柏唔止跑得，仲好能夠體現今時今日嘅領袖精神，就係時時刻刻都要一機在手，佢手上拎住嘅，並唔係乜嘢特別嘅計時、計步速器，而係一部黑莓，估唔到佢連跑馬拉松都要隨時準備check電郵，真係好佩服佢。
大吉利是，馬會有乜事發生，佢都可以喘住氣咁覆。呢張相出街之後，佢以後亦都應該冇乜藉口話睇唔到電郵或者聽唔到電話。而應家柏、周永健同鄭維志三位馬會阿哥早上跑完渣馬，下午就返去佢哋嘅主場，即係馬場睇跑馬嘞。