盃王大摩集郵成功！呢日第八場佢憑鎮倉寶「步步友」無驚無險稱霸三冠大賽頭關，繼1987年「卓惑」後，事隔28年重奪董事盃，當年「卓惑」負140磅勝出，當時董事盃仍是跑1400米。大摩從練至今，贏勻晒所有在港舉行之本地同國際一級賽，威過威士忌！
黑衣巨人「步步友」日前被國際賽馬組織聯盟評127分，成為全球第三高分賽駒，兼且創港馬國際評分新高，呢日夥拍最佳拍檔雷神跑三冠頭關董事盃，熱到只得1.2倍，披士派10.1元馬會保證下限，乃係意料中事。跑落呢匹五歲王者當本地馬冇到，沿途居後，直路抄出外叠自動加速，超越所有對手，雷神莫雷拉成條直路撳韁，既冇開鞭亦冇推騎，近乎完全冇郁過手，姿態如晨操慢跳咁，滋油到咁，都能夠造出1分33秒5佳速；第二名東廐「美麗之星」已輸個半馬位，第三名由摩廐「駿馬名駒」拎到，東廐另一駒「將男」跑第四。
摩、東廐包辦呢項國際一級賽頭四名，由於次熱「大運財」只跑第六，故呢場四重彩仍有8,007元。董事盃今屆頭馬獎金570萬，「步步友」在港累積13戰8冠3亞1季1殿，總獎金突破3,600萬，成就斐然。