銀娛（027）兩個新賭場項目，澳門銀河二期同埋澳門百老匯將於今年五月開張，太子爺呂耀東（Francis）呢排忙住做最後籌備工夫，不過忙還忙，農曆新年都要出埠放假鬆一鬆嘅，佢下個月就會去土耳其叉叉電嘞。
唔講唔知，澳門銀河一、二期嘅設計，就係Francis去東南亞旅行嗰陣攞到靈感，佢今次去土耳其又會唔會攞到靈感去設計澳門銀河三、四期呢？
講番銀河二期同埋澳門百老匯，呢兩個新場將於五月廿七號開幕，廿七亦係銀娛嘅股票冧巴，好啱喎。
Francis話冇留意開幕日就係銀娛嘅上市冧巴，只承認揀呢日唔多唔少都同風水有關，「我話冇就係呃你嘅，冇話唔睇下通勝嘅。」翻開年曆，呢日宜祭祀同入學。不過佢又唔係信晒風水，搞gag話「係嘅話，當日義和團都應該可以打贏仗啦」。