陳奐仁日前俾人喺將軍澳同中環掛咗條寫住「不是富豪陳奐仁 欠債還錢」嘅追債橫額，究竟係欠債定係俾人整蠱呢？噚日陳奐仁同鄧麗欣（Stephy）、文恩澄喺鑽石山出席「同舟共勉．愛家愛港」活動，佢否認欠債，覺得成件事係一個惡作劇：「我冇爭人錢，冇可能俾人追債，如果有人覺得我爭佢錢歡迎出嚟見證。」有冇得罪過人？佢話冇乜頭緒：「我待人有禮，唔知係咪有乜誤會，如果係唔好屈住，我都想幫到對方解決心結。」陳奐仁越講越覺得無奈，仲自爆高中時試過俾人屈，搞到有抑鬱，希望有人見到邊個掛追債橫額，可以話畀佢知。
Stephy曬黑變菲人
同場嘅Stephy，就啱啱同男友方力申去完馬爾代夫度假，Stephy話好後悔曬黑咗：「𠵱家有啲似菲籍，要極力美白。」有冇大解放裸曬？佢講笑話：「冇膽，驚俾人影到相。」唔知小方有冇好似許志安咁喺沙灘晒巨鵰呢？Stephy就話小方係一個好謹慎嘅人。
撰文：馮仁昭