民建聯蔣麗芸最近轉型做主持，搞咗個名為「蔣麗芸會客室」嘅清談節目，新一集仲搵到民主黨主席劉慧卿大談感情事。元秋喺節目一開首，原本都問吓卿姐有關政改嘅事，但卿姐趁機提起當年特首選舉中央忽然轉為支持梁振英，搞到民建聯都好尷尬，元秋嗱嗱臨轉話題，先問卿姐點睇被指出名惡，卿姐妙答：「𠵱家立法會惡人多到不得了，包埋你㖭……」
元秋之後單刀直入問卿姐過去邊段感情最刻骨銘心？卿姐今次學梁班子打官腔，話私人事唔多講，而自己係同香港福祉結咗婚喎。元秋即時白姐姐上身，感性話投入工作係必須，但感情來時係抗拒唔到喎，追問卿姐如果真命天子出現，話搵咗佢幾十年、咁會唔會接受？卿姐坦言：「我冇緊要，隨緣。」