股民對於「牛三」二字特別敏感，好易即刻聯想到牛市第三期、股市大炒特炒嗰陣嘅熱烈氣氛，中環威靈頓街附近上個月開咗一間叫做「牛三館」嘅菜館，呢個名夠晒好意頭。
牛市第三期係指股市成交暢旺，跌完好快又升過，人人都講股，人人都話有內幕貼士，二○○七年前總理溫家寶煞停港股直通車之前咪屬於牛三囉。牛三初期大家容易喺股市賺錢都幾爽㗎，尾段當然係另一回事。
華華唔知老闆係咪鍾意炒股票，只知道佢係專賣中國黃牛做嘅菜，而且係有三位老闆，一位係品酒師王耀龍，另外兩位係三昌牛肉老闆韋國雄同埋興隆食品郭智聰，所以裏面除咗可以食到牛肉做嘅菜，仲預備咗好多紅酒。
呢度嘅菜牌簡單得嚟亦都有啲特別嘢，當中有道「怒炒牛肉飯」，個名認真搞鬼，唔通廚師要keep住燥底咁去炒飯？