郭富城、英國球星米高奧雲（Michael Owen）、溫碧霞與夫婿何祖光及李國寶夫婦等，昨日在沙田馬場出席英國服裝品牌Kent & Curwen百周年紀念短途盃，第二度碰面的城城和奧雲，一見面即雞啄唔斷。奧雲以英語說：「今次來港會逗留三天，明天會出席足球活動，今天來馬場見到城城很開心，我們已是第二次見面，十分希望可以跟他一起健身，我們有共同嗜好，除了愛做健身，同時也喜歡賽馬，而且我在英國有自己馬房，有兩位練馬師。」
黐膠水傷面
城城昨日心情靚靚，還主動問記者自己是否瘦了，他說：「我呢輪喺內地拍戲，因為經常用膠水黐毛，俾膠水整傷晒面部皮膚，加上片場時冷時熱，真係好辛苦，今次返嚟會去睇中醫，聽日做埋楊千嬅個唱嘉賓就會返無錫拍戲。」
對於早前城城疑在網上裸聊R小姐，被問到以後還敢不敢在網上認識女孩時，城城說：「之前我已經喺微博解釋過，某啲人有動機咁傷害我，希望呢啲人快收手，我𠵱家感情係一片空白，係想正正經經搵個對象，但緣份係天注定，冇得強求。」舊愛熊黛林指城城欠缺安全感，他說：「過去咗嘅嘢唔再批評，做男人着同唔着都唔應該計較，有乜最好擺喺心，自己承受就得。」
採訪：黃曉妍
攝影：陳俊強