財經界唔少人都有落場跑渣馬，恒隆地產（101）助理董事（集團傳訊）關則輝就係其中一員。佢已經係第十一年跑渣馬，有時半馬，有時十公里，視乎嗰一年嘅操練情況，今年佢就跑十公里，五十八分鐘完成，跟舊年差唔多。十公里男子組冠軍約半小時完成，關則輝呢個成績算係咁喇。佢話，讀中學時已經鍾意跑步，閒時由以前慈雲山屋企出發，跑上獅子亭，跑跑吓上癮。佢笑言，自己知自己事，應付到半馬同十公里，全馬就唔好嘞。