舊年京東商城赴美上市，老闆劉強東同內地網路紅人奶茶妹妹傳出緋聞，一時分手一時復合，一出「京東愛情故事」搞到風風雨雨，知名度大增，股價自然大升。估唔到呢招俾萬達商業（3699）大少王思聰學埋，喺萬達院線上周四A股上市前夕，就傳出與女友張予曦分手的消息，股價梗係升到爆喇！
照計，呢的叫情場失意，股場得意。不過佢好快俾人影到一人拖六美女外遊場面，似乎仲happy。萬達院線招股價21.35元人仔，上市兩日，已經升咗近六成，有券商睇至少升到六十蚊，即係仲有排升。
王思聰喺上周四交易時段，發微博話「良心推薦一支股票給大家」，叫大家買萬達院線。佢喺微博粉絲超過九百萬，影響力巨大，有內地評論話係間接操縱股價。不過內地近期有句潮語叫「有錢就是任性」，即係有錢大晒。呢鋪佢個人持股已經升值過億元，老竇王健林身家因此至少暴漲過百億元，就嚟追上內地首富馬雲。
王思聰近幾年喺內地好紅，佢不時評論娛樂圈人物，感情生活又多姿多彩。有人話佢係花花公子，遲早敗身家。其實大少好醒目，就算言行再出位，亦從來唔講政治。單憑呢點，就包佢喺大陸冇事！
李可強