大家仲記唔記得唱過九巴廣告歌嘅香港獨立音樂人The Pancakes(蔡明麗)，亦即係《100毛》創辦人林日曦嘅老婆Dejay，近年佢都好淡靜，早幾日佢就share本報有關「捕獲野生發哥」嘅報道，仲話:「我真係受夠喇!個個都撞到周潤發哥,係我撞唔到!我決定化悲憤為寫歌,呢幾日要完成《給發哥的歌》(暫名), 嗚呀~」講真，香港地有邊個唔想撞到發哥!
而The Pancakes真係坐言起行，唔夠5日，就整起呢首《給發哥的歌》，佢留咗呢段說話:「為咗得到同你合照的機會, 我冒住畀人瘋狂餵食腐皮嘅危險,寫咗同拍咗呢首kai歌,作為一個阿嬋(連中女都唔再係),今次我真係豁,豁咗出去。希望我會在不久的將來,能夠和你偶遇,並且畀你聽呢首歌,和送上我的CD,然後一齊在街上自拍,再一齊跳起yeah~fan屎戟 敬上 」
呢首歌都係以The Pancakes一貫嘅平板腔調去唱，好唔好聽就見仁見智，不過就肯定係好多香港人嘅心聲，連杜汶澤都轉發:「轉發左，希望發哥睇到喎」Pancakes就回應:「嗚呀~多謝你,唔知點報答你好,或者我每隻CD送100隻畀你?」
《給發哥的歌》: http://youtu.be/qRsUMdq4y_k