香港經歷佔中運動後，令本港警察多年樹立嘅正義形象插水。各國央行經歷金融海嘯，央行決策者以往高高在上嘅智者形象亦逐漸消失。歐央行上星期公佈萬一億歐元量寬措施，市場普遍反應係總好過歐央行乜都唔做。
商品大王羅傑斯嘅睇法最正，「QE救唔到歐元……央行搞出問題比解決困難多」。金融大鱷索羅斯亦睇淡歐央行量寬措施，擔心引起歐元區十九個國家嘅極大政治迴響，阻礙財政改革外，仲加劇貧富懸殊。
最早實施量寬措施嘅國家係日本，美國二○○八年金融海嘯後亦開機印銀紙。市場將儲局同歐央行嘅量寬措施比較，發現今次震撼程度冇美國咁勁，因為大家有晒心理準備，加上當年投資者摸唔清點玩，儲局量寬成功壓低美國長期債息。
而家歐洲國債債息隻隻尋底，德國十年期國債債息只得0.397厘，葡萄牙十年期長債都跌至2.7厘，歐央行用買債手段壓低長期債息率嘅效果將受限制。而歐洲金融體系由金融業主導，今次量寬嘅熱錢將會流入銀行業，未必同美國一樣谷起資產價格。歐央行今次量寬想衝出重圍就要締造信號效應，向市場講明目標，例如通脹目標2%。歐央行亦可以壓低歐元滙率救經濟。歐元創十一年低位，兌港元見八算。計劃去歐洲玩嘅港人，可以趁機儲定彈藥換歐元做準備喇。
C+B
本欄逢周一刊出