酒逢知己千杯少，但酒逢梁粉呢……可能一杯都嫌多。咪以為花生友詆毀梁粉，查實梁粉陣營咁清高，仲有乜嘢可以挑剔吖，事緣不時喺酒會出現嘅花生友，查實都發現到梁粉同唐營中人有個明顯差別，就係對杯中物唔多熱衷，唔通係驚「酒後吐真言」？加上廠商會換咗新會長，有啲關於飲酒嘅新人事新作風，更加令花生友有感而發。
喺呢個江湖行走得，都知道摸住酒杯底同人傾吓偈，都係一個交流收料好途徑，香港唔少商會設宴時，經常以酒會知音，其中過往係唐營駐守地嘅廠商會，不時以茅台娛賓，令賓客盡興而歸。
緊跟阿爺節約風
但係被認定係梁粉嘅李秀恒接任廠商會會長後，即時有報紙引述消息話，廠商會要響應中央節約風，茅台要停供，由於消息嚟得突然，唔少會內人睇到都嚇一跳。緊跟阿爺高舉節約風喎，就算唔like都好難話反對囉，始終有啲「光環」，神聖不可侵犯！
之不過對與錯之間，應該有啲走盞位，例如係咪要一刀切停供？據聞會員都對此議論紛紛。係咪因為新會長以及佢嘅新班底唔嗜酒，所以有此節流新建議？唉，花生友點會咁高水平，讀到佢哋嘅心聲？但梁粉會長上場冇耐箒，咁快就想推翻傳統做法行新政，難免急到有啲得人驚。莫非呢道下（茅）台令，只係清算嘅前奏，一如李源潮所講：好戲在後頭？
作為塘邊鶴，花生友都係無謂咁鬼厚多士，諗吓下次若有幸去廠商會活動，係咪真係自備酒水好過咯！
花生友