終於到24800，有追開本欄的讀者應對這個期指價位不感到陌生，因我早就定了這個大市上升的首目標。早，不是認叻，反而是認錯，就因為早，在十二月尾一入市就要面對單日跌六百點的折騰，跟着又要面對月初一日跌八百點的煎熬。波幅不算大，但外圍卻風起雲湧，尤其是美股，升時慢，跌時急，要坐視不理並不容易，還好早就認定港股這段會比外圍好，所以能繼續坐上去，外圍一切終於給我咬緊牙關熬過去。
錯過最易賺五百點
衝上去24800的訊號很強，認定外圍只係障眼物，A股才是今次真正的game changer，A股不差，就沒事的了，標指跌30點算甚麼，一於坐上去。誰知我只捱到24300就沒有揸期指，只有揸現貨，平白錯過了最易賺的五百點，三天已經手到拿來，卻拱手相讓。何解失策？皆因一．一九慘劇，我唔怕外圍波動，但A股崩盤就驚驚，當日因孖展出事而大跌，仲跌到七年最大跌幅，我嘅分析認為內地是大輪船轉軚慢，政策不可能今天講明天改，所以應有一段調整，任你技術訊號多強，都要向現實低頭，事後孔明，我當然睇錯，訊號比人強，識訊號好過識人，照炒到24800以上。
事後翻查死因，只有兩大元凶。首因貪，當時我睇大市低於23300值得吸納，自己心裏都知道不是轉升為跌，只是估計有多幾百點跌幅，貪念遂生，想於較低點再切入，一字記之曰貪，放唔開一兩千點升跌幅，做長線投資會蝕章。第二個元凶，就係恐懼，由於信心太足，重貨上路，仲要加埋期指，大市一跌，連國壽（2628）這些慢郎中都跌近一成，心理壓力太大，平掉期指鬆一口氣，買些少期權組合做對沖，更係舒服。
人是惰性動物，貪舒服，加上市面一片先避其鋒的言論，說無令自己心猿意馬，是欺騙觀眾，倒後鏡睇返，減係無可避免，但要做到臨危不亂，當日唔應該太重貨，令自己太大壓力。咁點解咁重貨呢，咪又係一字記之曰貪，所以因貪而起，由貪而終，平常心是炒賣修為的至高境界，最低限度是我等凡夫俗子的至高境界。
這次期指錯過了最好賺的一段，現貨仍有唔錯收穫，照理不至於大發股喪，但金融市場往往一子錯，滿盤皆落索，所以一定要特別小心處理心理及策略修訂，本來打算持重貨，再揸期指，睇港股創歷史新高，到24800放一半期指，穩坐釣魚船，現在無期指在手，大市又火上加油，點算？咁就要睇上面篇檢討囉，現在再衝入去揸貨，又是貪，是被動，沒揸不會死，本來take profit的位，現在入，便變成入貨位，進退易失據，倒不如調一調步伐，緊持現貨，待下個期指訊號時，才由現貨轉期貨，到時有止蝕位，有目標，撥亂反正，重新上路，今期無畀任何一個冧巴給大家，但希望讀者能從筆者字裏行間，睇到炒賣的心理歷練，做到老學到老。
士佳提過的三月實戰班，喺周六、一、二，很多讀者到facebook查看，多謝大家捧場，希望同學生分享實戰經驗，邊做邊學。
張士佳