平時瞪大隻眼好鬼楚楚可憐feel嘅食物及衞生局局長高永文，偶爾都會感冒傷風鳥，明顯唔算強壯男啦；睇埋佢噚日跑渣馬，雖則好有頭威，一直一馬當先，但卻冇乜尾勢，跑到斷氣咁滯，最終扯晒蝦叫記者「拖住我」，真係弱不禁風、我見猶憐！
渣馬除咗全馬、半馬同十公里賽外，亦有跑一點八公里嘅「領袖盃」，似乎都係唔多運動嘅名人落場。食物及衞生局局長高永文、港大校長馬斐森、公大校長黃玉山以及律師會前會長王桂壎等都有參加。
八方現場所見，民望高明明好有頭威，一路都帶頭，但到衝線即刻現形，緊捉記者嘅手，喘晒氣大聲叫：「唞順條氣先，要拖我。」嘩，見局長氣若游絲，記者梗係義不容辭奉上玉手，同局長拖吓手、畀佢唞一唞。只見民望高其後面青青返回貴賓席，唔少在場人士都覺好搞笑。
民望高事後都笑自己，跑步「一年慢過一年」，跑一點八公里，或者要成十四分鐘先至可以完成。佢自爆賽前曾加參加沙田三公里跑，已經算有準備，唔知若然冇練跑，民望高噚日會係乜嘢環境？
而着住短褲嘅港大校長馬斐森，喺太太打氣下順利完成賽事，成績不過不失，仲話今次「唔夠喉」，唔通下次挑戰全馬？港大校務委員會主席梁智鴻亦有參賽，他話自己現年七十六歲，可能呢個賽事最大年紀參賽者，坦言志在參與。
曾德成唔面金正恩
而喺亞洲馬拉松錦標賽，冠、亞軍都係由北韓嘅女健兒攞到，八方斷估北韓領導人金正恩雖然滿意賽果，但就可能未必鍾意。話說喺呢個賽事嘅冠亞季健兒企喺台上、逐一播國歌等領獎時，民政事務局局長曾德成同馬拉松籌委會主席高威林最初都肅立；但播北韓國歌中途，佢哋開始旁若無人咁密密斟。唔少香港跑手都話局長應該畀啲尊重。
李八方
mailto:[email protected]