【澳門直擊】容祖兒前晚在澳門舉行演唱會，以黑色bra top襯螢光裙登場的祖兒大打親情牌，她說：「我平時乜都冇所謂，唯獨係感情最觸動到我，親情、友情都會令我好感動，上年我同媽咪身體都唔好，明白到過去十幾年嚟幾咁衝，其實最重要係健康。上年做緊騷，唔知媽咪唔舒服，知道之後好過意唔去。」
祖兒又賣口乖說：「媽咪喺澳門出世，我都算係流住小小澳門嘅血，咁多年工作上嘅磨練，係歌迷畀勇氣同支持我。」祖兒騷後接受訪問，指媽咪去了手信街購物，自己卻要留在酒店叫送餐服務，她笑說：「佢返到澳門好開心，仲生猛過我，我自己就好想食水蟹粥，做完騷會地獄式增肥。」
採訪：盧妹
攝影：沈健程
