律師會前會長何君堯早前接受訪問時，曾批評佔中人士自首後保持緘默，其實係賴皮、博出位，仲以謀殺作比喻，話如果有人向警方自首，但就連條屍收喺邊都唔講，根本唔係真誠嘅自首態度。
噚日佢出席《城市論壇》後被記者翻舊賬，問佢如果自首後保持緘默係賴皮，咁二○一二年政府有個「新界村屋僭建物申報計劃」，佢當時呼籲村屋業主唔好主動申報，係咪有啲問題？何君堯強調係兩回事，話佔領人士事先講咗會自願投案，「然後唔做咪賴皮」，但僭建問題上政府當時以五年寬限期利誘人自招，仲話每個人都有保持緘默權利。到底邊個賴皮？八方畀讀者判斷。