練馬師蘇偉賢搏馬唔會亂嚟，逢幫新勝馬打王牌，季內未甩過Q，之前四匹新勝王牌馬獲一冠三亞。呢日第三場佢隻「京城珍寶」上仗由蔡明紹開齋，今鋪加強配搭用雷神，出王牌再跑四班泥地千二米，結果大熱門順利再下一城。
今場「大把籌碼」貼欄放鳶，以為帶到可以爆16倍冷win之際，沿途咬住第二位之「京城珍寶」唔放過佢，追足大半條直路，兩駒單打獨鬥，掟甩晒後面啲馬，臨門「京城珍寶」將「大把籌碼」追過贏個多身位，後駒則功敗垂成做二奶，服役仲未識贏；三、四名分別由「領先直前」同「揚威香江」拎到，不過已經係幾個馬位之後嘅事，對前兩駒完成冇威脅。「京城珍寶」今季四戰兩冠兩亞百分百入Ｑ，可謂進步驚人。
「京城珍寶」馬主杜威說：「我十分開心，上次『京城珍寶』開齋時，我身處外地，由另外兩位馬主，即我的兒子啟邦及啟鋒到場拉頭馬，當時啟邦太太腹大便便入場，今次愛駒再下一城，我的孫女早幾天出世，帶給我們一家人好運，對我們來說是雙喜臨門。蘇偉賢是位很聰明及專業的練馬師，『京城珍寶』轉入賢廐時腳有事，在他悉心照料下，馬兒不斷有進步，今仗贏在用強手莫雷拉及負輕磅有利。聽蘇偉賢分析，此駒跑泥地比草地更佳，希望加分後再在泥地取勝。」