阿爺打貪反腐打擊埋澳門博彩業，賭場收入年年大升嘅景象已經成為歷史。不過爛船都有三分釘，話晒二○一四年收益都超過三千五百億澳門元，所以賭王何鴻燊旗下嘅澳博，今年都率先宣佈加薪5%，絕對係亞視員工都好羨慕嘅良心僱主。
之但係，風光嘅嘢，往往都係表面嘅。博企員工成日投訴分享唔到繁榮成果，搵食艱難。點艱難法呢？就係連餐安樂茶飯都唔係必然嘅。最近就有一位澳博員工，喺網上展示咗一張員工飯堂嘅飯餸相出來，費清睇完都唔知講咩好，只能慨嘆，美食呢啲嘢，人人有唔同標準。
相片顯示，呢味有魚有椒絲嘅菜，仲加料多咗一條蟲蟲（圖）。究竟呢件贈品係咩料？有人話係水曱甴，亦有人話係魚虱，總之就係大自然嘅一部份，而且含有豐富蛋白質嘅補品，食咗不單唔會死，仲可能對人體健康有幫助。嗱！呢啲咪良心僱主囉！
＃手足讚「新鮮」
班博企手足都好感恩，紛紛留言大讚，呢個話可以止夜尿，嗰個就話證明條魚好新鮮係海魚唔係人工飼養咁。費清向澳博公關請教，想話問下佢哋點解對員工膳食咁有心得。公關就叫我電郵畀佢查詢，但係可能假日關係，等咗成日都唔見回覆。
費清 ＃要生計，也要生活 ＃毋忘初衷