一向鍾意自拍嘅亞視美魔女花姨宮雪花，早前試過為咗整出個瘦削身形，竟然過度執相搞到欄杆都變埋形，但原來唔少外國女星，都一樣會犯埋呢種低級錯誤！荷李活麻煩女星蓮莎露夏恩（Lindsay Lohan）近日於instagram公開一張自拍照，相入面佢為咗突出自己S形身材，同樣亦令物件變形。
日前蓮莎喺玻利尼西亞被蚊叮到後患上基孔肯雅熱（Chikungunya）曾經入院，噚日佢就自拍咗一張着住底衫褲喺浴室鏡前嘅自拍照，佢話：「我嘅CK內褲幫助我擊敗基孔肯雅熱。」不過喺instagram擁有兩百幾萬追隨者嘅佢，就被唔少眼利嘅網友發現佢為咗黃蜂腰，執到連洗手盆啲擺化妝品嘅樽都變咗形，忍唔住留言踢爆佢，令蓮莎𤓓爆當場！
撰文：李村姑