有單新聞覺得underplayed，就是李嘉誠紅顏知己周凱旋（Solina）兩周前在以色列接受香港傳媒訪問，談到自己選特首可以「諗諗」。新聞曝光後，李嘉誠即代伊人澄清是「講笑」。於我看來，Solina的笑話未必不可能成真。
據當日有份在以色列採訪Solina的記者報料，由於今次是受李嘉誠基金及維港投資邀請到當地參觀，因此最初訪問周凱旋亦只圍繞以色列的科技投資。然後是Solina先岔開話題講香港政治，有聰明的記者順勢問她會否選特首，一般人聽到這種問題，諗都唔使諗會答「痴線咩！」只有心有此念的人，才不會封絕後路，除咗好似689這種長期擘大眼講大話的人。
進可攻 退可守
Solina不愧為社交高手，第一個反應是先反問在場記者會否選自己，然後才說「答唔到你，等我諗諗」。呢句進可攻，試下民情；退可守，當講笑啫。
查實周凱旋係咪口快快玩大咗？有當日在場記者將訪問Q&A謄寫出來，讓周凱旋一方核實，以防出街後反口無講過。如果真係覺得講大咗，都會搵公關同記者講句「不如唔好寫」，但無喎。
周凱旋若參選特首，我會投她一票。先論樣，佢輕易砌低葉劉，行出來代表香港都唔失禮。論品格，貴為首富女朋友，起碼唔使貪污先啦。論國際視野，現在她打理的維港投資站在科技startup界頂尖。就算Solina無阿爺祝福，她入閘都有助攤薄某些候選人票源，這也夠好玩吧。
何淑茵
mailto:[email protected]