上星期借王昇兄「板塊尋寶」殼出稿，今日本欄「笑到最後」終於以介紹形式上市，多多指教。欄名叫「笑到最後」，就係要強調炒股賺錢係過程，笑到最後係終極目標。
唔係貪刺激，唔係為認威，唔係為求一個身份，純粹只想錢搵錢，所以買賣股票。冇錢搵時，咪唔買囉！即使本欄達唔到笑到最後嘅目標，亦都希望本欄可博你一笑，無論是歡笑或嘲笑。
之前高明批評港交所（388）停板機制建議書都唔識寫，冇原因硬推，建議重作。港交所市場營運主管李國強先生立即回應，態度抵讚。
港交所諮詢文件自我推翻「閃崩」呢個原因，剩低理據只有「人有我有」。港交所回應又重覆一次「大部份國際市場（如美國、英國、澳洲、日本、韓國及新加坡）均設有若干形式的市場波動調節機制……」。
對於呢種典型中國小農心態，高明想喺度同港交所同事分享一個網上流傳猶太人同中國人做生意嘅故事。
第一個猶太人來到小鎮上開油站，生意很旺。第二個猶太人想到油站客戶要吃飯，所以開餐廳。第三個猶太人想到來小鎮的人需要住宿，於是開酒店。
第四個猶太人又發現住店的人需要生活用品，於是開超市。第五六個又開其他店舖………結果很多猶太人富起來，小鎮變得繁榮。
人有我有的心態
反觀，第一個中國人來到小鎮上開了油站，生意很旺。第二個中國人羨慕第一個投資油站的人，即刻開第二間油站。第三個中國人見前面兩個同胞油站生意很好，火速開第三間加油站。
第四五六七個又開了油站……結果各油站都要減價惡性競爭，紛紛倒閉，小鎮打回原形。
港交所對停板機制既論述，仍然停留於人有我有嘅小農心態。有時唔係唔抄得，但你抄完有乜好過人？香港重理工輕文史，行動理由從來都係「老細叫到」，港交所冇人才用道理去解釋原因，勉強理解；但係文件完全講唔到值唔值、停板有乜着數呢個搵食層次嘅問題，先真正叫人失望。
不過，本欄都要讚一讚美資投行都睇得起嘅李小加，講明停板機制「與內地看齊不是目的所在」，同中國割席；要抄，都係抄英美澳日呢啲優等文明國家。可能高明同小加喺呢件事上有分歧，但係崇優大方向上，我哋睇法係一致嘅。
最後，過去幾個禮拜A股顯示，如果禮拜頭跌，之後多數升得返。原理係禮拜五博減息炒咗上去，點知收市後冇料到，甚至有壞消息，到禮拜一散水，周而復此。如果相信A股仲係大牛市，跌，就係加碼時機。今浪炒市不炒股，冧巴降都唔使中，有大買大。
如果今明兩日有較大調整，建議買入平保（2318）。
高明
本欄逢周一刊出