沒有特別原因，只是自幼喜歡打籃球，NBA更是由細睇到大，加上十個玩具迷九個都會答你：「搵番童年回憶囉！」所以熊勵衡（熊兄）儲了一大堆NBA figure，大的、細的、外國的、大陸的、正版山寨自組的統統都有。但特別的是，他不像其他玩家般純粹用來擺設，反而最愛「粗玩」，扭手扭腳重現經典場面，「講明玩具，梗係要玩！」
記者：韓繼聰
攝影：劉永發
「好多儲玩具嘅人都好得意，我會叫佢哋做『八角大師』，即係唔拆盒之餘，仲要連盒嘅八隻角都要完美無瑕，好誇張。」但熊兄強調絕非取笑他們，只是各有所好，他們是收藏，自己是粗玩。「呢啲NBA figure畀我最大嘅樂趣係可以重現當年嘅比賽，甚至係一啲冇可能的畫面。」
最初，他玩美國Upper Deck的硬figure，手工認真一般，更不能動，但它們勝在擺出了招牌甫士，足夠讓他樂上半天。「後嚟香港品牌Enterbay嘅figure越出越精細，頭雕勁靚，又有肌肉紋理，連波衫都一絲不苟，同真嘅一樣。」而且關節可動幅度夠大，可擺出極其像真的打波動作，令他十分興𡚒。筆者見過不少玩具收藏家，雖然未至於是「八角大師」，但真的很少會像熊兄般大扭特扭。訪問當日，他便找來Iverson及Kobe，一人進攻一人防守，重現當年Final的精采對決。
除了攞正牌有版權的Enterbay NBA figure，他也愛沒版權的「山寨貨」。「質素當然冇咁好同像真，但當中都有唔少得意嘅嘢，好似呢兩隻《男兒當入樽》嘅沢北同櫻木，樣唔似，關節設計又差，但波衫算唔錯，最過癮係可以換cute版頭，算有啲誠意。」
極愛超精細鞋盒
「仲有一個特別喜歡嘅，其實係有版權的Rodman，只係佢嘅版權唔係打NBA，但潮look嘅發揮空間反而仲大。」這個Rodman（右圖）身穿皮草，更有多個髮型可供更換，配上黑超及化妝面相，妖氣十足，是他最愛之一。玩玩具結識到志同道合的朋友是老生常談，熊兄亦不例外，其中一位朋友為figure球鞋手製的鞋盒更精采得讓他折服，「佢好有心機，印刷貼紙都一絲不苟，甚至連盒裏面嘅紀念卡、雪梨紙都完全重現！」結果這些小鞋盒又成了他的藏品之一。
婚後即換衫 實現籃球夢
玩figure，近期大熱當然是3D printing，熊兄結婚時不但把自己與太太的樣子做成頭雕，更穿上婚紗禮服，「不過我更想做NBA球員，所以婚後我就即刻將我個figure換咗波衫，你睇吓係唔係好有型？哈哈哈！」他更說這件波衫朋友自製的，手工相當不錯。
新Game限量 湖人林書豪
說到NBA，當然少不了近來最新推出的中文版手機遊戲《NBA決戰時刻》，玩法是模擬經營球會。因為取得版權，全數三十隊NBA球隊、數百位真實球星及經典球員都會現身遊戲。而玩家則當球隊經理，組合出最強隊伍挑戰冠軍。除了調兵遣將、制訂戰術，最後一節更要在十秒內決定控球、傳球或跳投，作致勝一擊。遊戲介面簡潔易操作，球員雖以可愛版登場，但相當具神髓，NBA球迷必定玩得投入。
另一重點是Enterbay特別為遊戲推出全新版林書豪figure，熊兄說：「之前買嘅林書豪着住火箭球衣，點知佢轉頭就轉會湖人，今次終於改着最新嘅湖人17號，球衣質料更似落場波衫，仲加設佢招牌嘅眼鏡手勢！好正，點先買到？」想買它，遠一點可以在本月廿八日至二月一日到台北國際電玩展的nxTomo展區入手，近一點則可留意二月一日舉行的《NBA決戰時刻》快閃活動，到時有機會贏得新林書豪figure！熊兄同其他NBA迷就要密切留意《NBA決戰時刻》的facebook啦！
facebook專頁
https://www.facebook.com/nbact.hk
查詢
http://nba.nxtomo.com/hk/
《NBA決戰時刻》 iOS/Android 免費