渣馬確係一年比一年墟冚，連平時只會喺健身房跑步嘅瑞信認股證及牛熊證銷售主管何啟聰（Ivan），今年都抵唔住朋友慫恿而第一次跑到出大馬路，參加十公里賽。佢事前練習街跑五至六次，自己估計最終以五十六分左右完成，喺佢目標之內。Ivan話，開步同衝線時，因為人太多而有爭路嘅困難，尾段銅鑼灣上斜對意志都有好大考驗，係最辛苦嘅一段；不過佢就非常享受嗰種健身房體驗唔到、不斷有微風迎面嘅清新感覺。