四歲馬好開有條路，近六次田戰共有十匹四歲新勝馬跑三班或以上賽事，並獲兩W六P，上名率高達八成。周日(25日)再有五匹四歲新勝馬亮相三班或以上賽事，計為第五場「明多多」、「點解」；第九場「金珀龍華」；第十場「聰敏不凡」及「比卡超」，各駒同樣贏完不轉路程，為連捷提供有利條件。
第五場梁芷珊的團體馬「點解」上賽轉投蘇保羅馬房初出即贏四班1200米，負133頂磅難度不低，加分後雖要跑高一班，但路程照舊，蘇廐一月份攻勢特別猛烈，此駒可望好開續好。同場「明多多」今季三戰兩冠一殿，上仗正是於田草B加2欄建功，刻意等番同一移欄再跑，可與前Q串成四歲新勝馬Q。
第九場「金珀龍華」勝後小休再跑三班1200米，加六分只比上仗多負四磅，負125磅絕不重，結合「龍華」系馬不乏連捷先例，這匹750萬上季最貴拍賣馬，勢可再顯身價。
第十場「比卡超」季內五戰兩冠一亞一殿一第五，表現大熟大勇，1400米乃唯一勝途，寧超磅仍續配郭能，戰意有保證，連捷不無資格。同場「聰敏不凡」以往兩次打王牌不勝有位，今仗仍有王牌在身，不跑經典一哩賽拾難取易，力足再下一城。
【LIVE】渣馬直擊
http://bit.ly/nextmedialive