亞視近日衰到貼地，回顧七、八十年代風光歲月，蕭若元與拍檔麥當雄在亞視前身、即麗的時代創作了《鱷魚淚》、《浮生六劫》、《天蠶變》及《大地恩情》等經典劇集。看着亞視每下愈況的業績，蕭若元由心痛變為冇眼睇，日前他接受本報訪問，並抵死說：「亞視𠵱家好似植物人，唔得都吊住條命，生人霸死地，霸埋棺材山地。亞視植物人時代七、八年前已經開始，每個老闆都搵咗替身先准死，借屍還魂，呢個死局，死唔斷氣，係我就情願執咗佢。」
寸王征使多餘錢
拯救亞視的白武士最遲明日要入標，否則亞視將面臨清盤，蕭若元說：「當初王征唔揼水，佢睇死北京唔會見死不救，點知收到通訊事務管理局話要審批續牌，亞視舊年出咗十一月半份糧開始現轉機，王征態度軟化，點都要吊住亞視條命，希望執番啲神沙走。𠵱家睇吓邊個愛國商人肯拎十幾億出嚟，乘機又攞啲彩。」蕭若元揶揄王征只有緋聞沒有改革，對於他被連環踢爆騷擾男藝人，蕭若元寸爆：「我戥佢唔抵，要交男朋友，唔使花廿億，幾千萬都好靚仔。」
估無綫餘十年命
蕭若元表示亞視即使有金主解決財困，也要徹底重整旗鼓才有望「翻生」，他隨即獻計：「可以叫王維基幫手，佢興帶資入嚟，又有魄力。陳志雲都好有諗頭，再唔係撬埋樂易玲過檔，仲可帶埋小生花旦入嚟㖭。」不過他認定網絡世界是主流，電視台式微，他預測無綫也僅餘十年壽命便面臨摺埋。
採訪：比華利
【LIVE】渣馬直擊
http://bit.ly/nextmedialive