早晨，今日街上人聲鼎沸，跑友們前仆後繼，正好好享受每一步。至於沿途打氣嘅我哋，就其實都可以做多啲，就係嗌口號都可以嗌得有心思啲，唔好咁hea。
所謂口號，其實呢兩日睇電視聽唔少，但睇住亞洲電視個show真係越聽越唔明，明明係老闆唔出糧，員工頂硬上，但大家仲係好畀心機搞咗呢個打氣節目，係warm嘅，因為同其他大台大show唔同，呢個節目做嘅同睇嘅都唔係錦上添花，而係雪中送炭，當然仲有好多係啤酒送花生嘅朋友睇啦。據說節目得到唔少廣告費，亦會即刻用嚟出糧，即買即賣，非常自食其力，好過睇老細面口。
不過剝花生嘅朋友呢晚聽得最多嘅口號，來來去去幾句；大家加油、支持到底、世上冇難事．．．應該全部都係喺小學生運動會「抄考」返嚟嘅！
幾款口號都畀人一種感覺，就係講就易囉，但最悲嘅係，家陣我哋喺香港街頭跑步聽到嘅打氣說話，都係來來去去呢幾款，好得體好客氣，亦其實好空洞，好事不關己，對方答乜都唔係幾重要，問嗰位根本唔關心囉！亞視朋友家陣嘅心路歷程，應該同落場跑嘅朋友差唔多，旁邊好似有好多同路人，出發時可以一齊倒數叫口號，但一上咗跑道就乜都假，日曬雨淋天寒腳痛都只係自己顧自己，包括安慰自己，譬如見到跑得自在嘅朋友，可以學吓佢點樣樂觀面對逆境；見到跑得痛嘅，就可以安慰自己一句，世上慘過你嘅人仲有好多，咁應該會舒服啲。
點打氣最好？要設身處地，考慮對方家陣面對咩情況。對住落後緊嘅：唔係差好多，咬住啖氣追呀！對住包緊尾嘅：行快兩步啦，如果唔係要上車啦！對住宅男咁款嘅：前面有靚女呀！對住就嚟想放棄嘅：仲有兩K就到終點啦，啲蕉派完即止呀！
今年我會咁樣同跑手們打氣：你就好啦，頂多陣就到終點，好過亞視啦，都唔知終點喺邊！至於亞視嘅朋友，冇終點你哋都跑咁耐唔放棄已經好叻，但係其實世界上仲有好多正規嘅馬拉松，可以畀你哋好好發揮㗎。
KEYMAN
節目主持