「大家繼續努力！」雖然呢句非常似無綫員工替亞視打氣樣版句，但我係對今日渣打馬拉松（圖）眾跑友致敬。小弟自小體弱，追巴士都會哮喘發，多年嚟見身邊朋友同事，個個都組團跑步練氣，再報渣馬，自問冇呢個能力，所以都係食花生算數。
「大家只要有信心，就可以見到光明。」唔好誤會，我唔係學無綫撐亞視，亦唔係同早前渣打股票部被裁一百人講嘅，我只係同跑渣馬嘅朋友講箒，因為你參加緊係世上少有嘅三更馬拉松；政府只可以容許你喺最少車輛使用道路情況下佔路，所以你會一邊跑一邊見到日出光明。
「冇錢收仲要拎錢報名兼坐車去跑步，體驗咗港人獅子山下精神。」容許我借元秋撐亞視金句，嚟替跑友打氣，講真，排住隊畀錢報到名已經係一項成就，仲要唔計回報，每日付出時間勞力汗水練習，呢條路絕對唔易行，你哋比留守亞視嘅員工仲勁。
「堅持到底，永不放棄！」對唔住我應該係被無綫藝員支持ATV條片洗腦，身為花生友，講真，你跑成點，又或者你個電視台點，我只係可以講呢啲說話去鼓勵吓你咁囉。
「加油加油，大家加油！」原諒我再借無綫撐亞視嘅口號，不過今次係對帶雨遮、帶黃絲帶、帶真普選banner或貼紙，以及用任何方式表達訴求嘅跑友。
「收皮啦你！」呢句係對鳴槍禿鷹，以及亞視講嘅，麻煩轉達。
梁栢堅
填詞人+彩池人