今期第二場四班田草2000米，有隻超級大懶鬼「樂在其中」列陣，呢匹馬唔係冇質素，但性格就非常之懶，喺陣上要由頭騎到尾，大鞭大鞭打落去，先至肯全力奔跑。大前仗谷草一哩郭能騎到甩轆，好遲先達至全速，大勝對手兩個馬位，表現有餘未盡。到咗前仗易配意國猛將杜滿萊，隻馬想愉懶，杜滿萊騎到飛起，出盡九牛二虎之力，先僅僅力壓「常盈多」取得連捷。
其實呢類遲熟長途馬，只係開竅不久，應該仲有好多進步空間，點知上仗「樂在其中」實在太懶，杜滿萊打極都唔郁，結果大敗收場。
不過練馬師姚本輝都唔係冇方法治佢，上次賽後輝哥表明，將為隻馬更改配備，希望逼出佢嘅速度，果然今次重戴眼罩，而且喺本月中曾戴眼罩試閘作出測試，當日馬主亦有到場監督，可見好緊張愛駒嘅進度，結果隻馬沿途居中之下，直路有啲走勢得第三，明顯戴咗眼罩後懶性大減。今次「樂在其中」初配楊明綸會有啲新鮮刺激，加上只負111磅超輕磅出賽，睇怕有機會取得季內三捷。
【LIVE】渣馬直擊
http://bit.ly/nextmedialive