每逢十二月至一月，香港都舉行唔少樂壇頒獎禮，得獎歌手自不然多謝一吓經理人，多謝Paco、多謝Mani就聽唔少。其實國際球壇都有一個超級經理人，就係佐治文迪斯，佢旗下球員就有基斯坦奴朗拿度（C朗）、占士洛迪古斯等巨星，文迪斯為咗想曼聯買斷法卡奧，仲想用迪基亞做籌碼㖭！
出自傳契仔C朗撐場
四十九歲嘅文迪斯一九九六年已經成立經理人公司GestiFute（見附表），靠佢嘅獨到眼光，簽入唔少葡萄牙、西班牙籍，以及到過葡萄牙搵食嘅南美兵，啱啱拎金球獎嘅C朗，就係佢得意門生之一，周四文迪斯舉行自傳發佈會，頭號契仔C朗梗係有畀面出席撐場啦。
足球經理人最搵錢梗係靠球員轉會一買一賣抽佣金，文迪斯今季初已經促成占士洛迪古斯、迪馬利亞、迪亞高哥斯達等天價轉會，認真和味；不過一月轉會市場靜過鬼，文迪斯就要搞風搞雨𢱑生意。佢旗下嘅二十八歲哥倫比亞前鋒法卡奧，坦白講大傷之後已經不復當年勇，今季以借將身份加盟曼聯，曼聯領隊雲高爾仲成日踩佢㖭，睇嚟亦都冇意以五千萬鎊（約5.8億港元）買斷佢。
「五分鐘就改變一切」
文迪斯唔想見財化水，就諗到陰招，事關曼聯門將迪基亞都係文迪斯旗下，呢個西班牙神龍同紅魔鬼只餘十八個月合約，曼聯當然想出天價同佢續約；不過據報文迪斯就要求曼聯買斷法卡奧，先有得同迪基亞傾續約。文迪斯喺自傳發佈會就語帶相關咁講：「𠵱家迪基亞仲同曼聯有約，我哋都尊重合約精神，但係呢啲嘢五分鐘後就可能改變一切。」
雲高爾煩緊法卡奧同迪基亞，連排陣都繼續被人話；佢堅持3-5-2陣式，成日俾紅魔鬼球迷批評，要求佢踢番4-4-2，不過雲高爾就堅持：「如果我排4-4-2陣式，就好似俾針拮屁股一樣，成場都唔會安樂，主場險勝韋斯咸嗰場就係好例子。」
識睇，一定係睇足英台【英波Live】：
http://soccer.appledaily.com
http://bit.ly/engballlive