今天英足盃做主菜，重心揀早場，博英冠窮球隊布力般流浪（圖），主場擋得住近況不濟嘅英超球隊史雲斯，受讓平/半取下盤。
好多著名球隊，跌落有「地獄」稱號嘅英冠，就翻唔到身。好似布力般，九四至九五年英超冠軍；那些年猛將如雲，舒利亞拍瑟頓呢個「SAS組合」，入球不停，費Sir嘅曼聯都冇有怕，諗落仲津津樂道。可惜，近季由印度班主接手，管理唔掂，唔經唔覺落咗去英冠第三季，剛公佈最新負債，高達八千萬鎊；遠遠超過公平財政條例嘅負債上限，今季同諾定咸森林、列斯聯齊被罰唔准再買人擴軍，下季仲隨時會被扣分，或者成為𠵱家墮落英乙嘅樸茨茅夫翻版，幾坎坷！
印度老闆落咗柯打，要球會今屆升班解困；升英超，個個都恨，睇番布力般𠵱家排第十位，距第六位嘅屈福特有八分，季尾入到升班附加賽區域唔容易，不如見步行步，攻吓英足盃，搵番多少使費。首席射手法國兵基斯泰迪準備賣去英超，但領隊加利保耶話今場會出番佢；另一土炮射手佐敦洛迪斯，之前重金喺哈特斯菲爾德撬返嚟爭升英超，表現唔曳。
英冠隊例牌主場硬淨
英冠球隊普遍喺地頭硬淨，今屆聯賽主場排前十幾位嘅平均有75%不敗率；布力般當然唔例外，今季喺伊活公園踢十三場只係輸過三場，全部係排佢哋前面嘅打比郡、錫周三及狼隊。
對手「天鵝」史雲斯，近兩戰喺主場不勝，上仗仲淨吞車仔五蛋，冇咗射手韋菲特邦尼，同踢緊亞洲盃嘅中場大腦奇誠庸，原本已變平凡；加埋踢英足盃必定輪換，好似前線會用未喺聯賽入過波嘅安尼斯掛帥，龍門用唔穩嘅後備查美爾，呢隻「鵝」更弱。今場除博布軍受讓下盤外，兼取「和局」，兩隊收多場錢，重賽再算。
「黑貓」新特蘭加埋新簽迪科爾，鋒線夠「叠馬」，點輪換都唔怕；招呼北上兼周中劇戰贏波嘅英冠隊富咸，有力贏兩粒或以上。另外明天守尾門嘅衞冕阿仙奴，南下英冠白禮頓；兵工廠呢刻信心滿滿，踩藍月亮個場照贏，會怕白兵咩！
波神
神級攻略 智破足彩
識睇，一定係睇足英台【英波Live】：
http://soccer.appledaily.com
http://bit.ly/engballlive