一度被列入失蹤人口的李逸朗（Don），原來當年離開了英皇之後，向北發展，賺了不少人仔的阿Don，最近再度活躍香港的樂壇，昨日網上更流傳了他翻唱陳慧嫻經典歌《儍女》，本來女歌男唱不是一件奇怪事，但最特別的地方是阿Don的哭腔唱功，歌曲初段唱功極度哀怨，到末段更加淒厲，阿Don聲嘶力竭兼慘痛道出女心聲，雖然沒有「兒夜姨野以夜儀野」，但仍然觸動不少網民的神經，神曲一出，大家爭相留言，有不少人大嘆這首歌難消化，有人覺得似「哭墳」，亦有人說：「聽咗十秒，果斷熄咗佢」，甚至有人話「大酒店專用？」
叱咤年度歌已出現
當年與阿Don屬同一公司的趙學而，亦留言說：「佢冇嘢嘛？搵朋友傾吓偈啦，屈住屈住傷身呀仔！」商台叱咤嘅my903 fb專頁更說：「踏入二○一五年未夠一個月，小編相信今年嘅年度歌曲已經出現！正如莫文蔚話齋：『講唱歌唔係唱唔唱到個音，而係唱唔唱到個感情。』李逸朗新碟入面呢首《儍女》，絕對夠晒感情，仲好有畫面㖭！小編聽到一個男人失戀飲醉酒，邊喊邊回憶呢一段情，到最尾崩潰嗰吓，肯定係掃晒啲杯落地啦！邊個話男人失戀唔傷唔喊㗎？」
原唱陳慧嫻：我輸咗
阿Don昨日在電話回應說：「有人關注係好事，呢張碟係好自私去做，呢一個唔係哭腔，哭腔係另一種技巧，我自己唱歌就冇乜技巧，只不過係有啲極端嘅情緒！」他更說：「音樂唔係喺一個框框裏面，亦都唔係大家習慣咁樣聽，所以咪咁唱囉！」
另外，原唱者陳慧嫻昨日在電話上笑說：「我輸咗喇，佢唱得感情比我豐富咁多，不過我覺得呢個《儍女》嘅劇場版，我好恨快啲睇到個MV同埋佢點樣現場演繹隻歌，我覺得佢幾有綽頭同娛樂性，呢個我幾鍾意。」
採訪：王連連、皓騫
【網友話】「唱K飲大咗？」
李逸朗翻唱《儍女》一曲，瞬即惹來不少網民迴響：
Ka Kei Li：佢係咪唱K嗰陣飲大咗唱畀Mandy聽㗎？
Love Melody Lee：真係唔知點講，我聽咗二十幾秒就已經關咗，自問不懂欣賞！
Chee Chung Wong：應該係諗住參加《我是歌手》？靠最尾嗰幾秒贏冠軍。
民眾洋娃娃：真係好有感情，好underground，不過可唔可以喊完抹乾淨晒啲囗水鼻涕先唱呢！