噚日立法會財委會因為拉布阻政府拎錢開創新及科技局，建制泛民自然又互片！泛民今次係審議漁業基金撥款時，已提早郁手拉布，長毛發言時候，寸民記漁農界議員何俊賢唔似漁民。
長毛又鬧佢過去從未為漁業發展貸款基金爭取過，「你（何俊賢）唔好話我聽你係漁民，漁民唔會咁白淨，講嘢都有啲口音，你扮乜嘢代表漁民？黃容根就似嘞！」
長毛仲好「專業」咁分析，話漁民經常吹海風，身上會有陣海水鹹味，但何俊賢身上只有香水味，而且佢咁白淨，點都唔似經常出海，仲話何只係保皇權貴，邊係漁民！
何俊賢就反駁話自己係咪權貴，社會自有公論，仲話現時科技進步，好多漁民「真係未必好多要日曬雨淋，靚仔過我都仲有！」