今個星期又同大家講吓比較少提嘅蘇格蘭超級聯賽，今晚蘇超下游羅斯郡對榜首些路迪（圖），唔好以為些路迪食硬就唔買；羅斯郡喺上年年尾摸和過些路迪。今次些路迪一定出盡全力去贏，按佢哋傳統打法，出波多角球一定多，睇吓開出「角球大細」中位數係11.5球就知喇，雖然多咗啲，但我都推薦角球「大」。
西甲方面，就揀馬德里體育會對華歷簡奴呢場強弱對戰。馬體會最近大戰連連，士氣唔跌體力都跌，似乎都要轉打穩守突擊。不過，穩守突擊唔一定唔好，回巢嘅費托就至啱咁打，如果華歷簡奴淨係睇實「大嚿佬」文迪蘇傑，費托機會就一定多多啦，呢場都要「大」穩陣。
至於本地球圈，上半季港超幾支中下游球隊喺下邊打生打死，由第五至第九相差都只係幾分，就算今季只降一隊，但邊隊都唔想降，所以轉會窗一重開，嚟既嚟轉既轉，隊隊球員名單都有改，前日同流浪漢既平哥講起，佢地都出出入入轉咗幾個，雖然分數上有危機，但見佢哋又放咗兩個代表腳上山，諗極唔明；於是細細聲問平哥點解？平哥又蚊咁細聲答我：「領隊，你有所不知喇，放得佢兩位大哥走就一定有原因啦！總之希望佢哋生生性性，至於點解真係一言難盡呀。」唉！我話咁即係冇講，我好冇癮咁轉身走人喇，點知原來青訓輝企喺門口。
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive