東涌逸東邨上個禮拜有流浪狗咬傷兩名男女，出動到漁護署捉狗隊人員到場搜索，但就一直搵唔到隻流浪狗。身兼離島區議員嘅工聯會立法會議員鄧家彪近日就貼出告示，呼籲街坊舉報冇人看管嘅大型狗隻出沒地點同時間，仲叫大家可以致電九九九、漁護署或逸東邨管理處，勢要將隻流浪狗繩之於法咁。
不過有居民同八方講，漁護署𠵱家見狗就捉，至少已經捉咗五隻，擔心咁落去東涌流浪狗會統統俾人捉去處死，仲有狗主話行開一陣隻狗就俾人捉咗，要去贖番。其實早前已經有街坊向《香港動物報》報料，話當時目擊到係對受傷男女拎住行山棒打隻狗在先，有街坊就希望阿彪搞清楚事實先好關注，提醒佢與其捉狗，不如幫隻狗平反。