馬會為咗慶祝一百三十周年，贊助咗世界著名嘅Cavalia（卡瓦利亞）劇團，首次來港演出國際級馬術匯演，馬會噚日開記者會介紹呢個匯演，行政總裁應家柏話，馬會一百三十周年誌慶嘅精神係與民同樂，希望將呢個匯演帶畀全港更多市民，所以安排咗多場特別日場，免費招待一萬名中學生同基層市民。
除照顧咗中學生同基層市民外，馬會又會將部份正價門票，以八折優惠賣畀市民，又會係四月三日到五日，安排Cavalia現身沙田馬場彭福公園，喺馬會一百三十周年社區活動「同心同步同樂日」入面表演。至於門票折扣優惠同、社區同樂日安排，市民可以去馬會一百三十周年主題網頁 http://WWW.130.hkjc.com睇公佈。