雖然仲有一段時間先到農曆新年，但各政黨已經開始落區搞新年活動，建制派就梗係出動蛇齋餅糭，八方聽聞好多建制派地區議辦已開始搞緊送揮春、辦年貨活動，泛民就冇咁多資源，惟有用人手搭夠，同埋搞吓新意思！
公民黨梁家傑就自己親自落場寫揮春，之前特登喺辦事處練大字，寫到成枱都係揮春，可見袋巾係幾咁認真，而且手寫揮春比印刷品有誠意！除咗派揮春之外，袋巾今年仲搞搞新意思，以往議員都會喺地區派利是封，袋巾今年就改用利是封幸運輪派，要好似玩老虎機咁轉中三格同圖案先有得拎。袋巾仲係facebook話，今次用抽獎形式派利是封，街坊反應出奇熱烈喎。