向來鍾意論功行賞嘅梁振英，噚日又有新搞作，繼早前委任反佔中反到中止贊助三家大學獎學金嘅俊和發展副主席彭一邦，出任經濟發展委員會成員，引來政圈譁然之後，噚日又有反佔中人士被委以公職。話說曾高調反佔中嘅理文造紙主席兼百仁基金主席李文俊，同埋曾參與反佔中聯署簽名運動嘅黃大仙區委任區議員莫仲輝，噚日突然獲政府委任做攜手扶弱基金諮詢委員會成員，雖然比起彭一邦，個獎品細咗小小，但總好過冇啦！八方諗反佔中最勤力嘅偲嫣BB，同埋最近頻頻開工嘅收工男傅振中，仲有反佔中反到出晒位嘅周融，唔知幾時先有賞呢？