政府新聞主任協會喺上周五（一月十六日）出咗通訊，關注政府新聞處要喺今年直接招聘八至十個新聞主任（IO），令到一班年資淺少少嘅助理新聞主任（AIO）巧京京。嘩，咁容易就有八至十個新聞主任空降，咁坐到幾時先輪到佢哋呢班AIO上位先？唔通青少年要向上流，AIO就唔使咩？有啲AIO仲覺得，管理層偏心某啲傳媒機構嘅人，想趁開位羅致佢哋，無視現任AIO嘅經驗喎！
為免AIO嬲到起革命，新聞處喺通訊發出後四日（一月二十日），由副處長斐博歷（Brett Free）出信解釋，話請人係睇能力唔係睇年資，𠵱家機制上有八十九個高級新聞主任、八十一個新聞主任同四十個助理新聞主任，估計今年底有五十個IO空缺。根據二○一四年底嘅評估，有二十六位AIO適合做署理新聞主任，但仲差十個IO先夠數，即係話就算內部升人之後，都仲有空缺㗎。斐博歷仲再派定心丸，話如果AIO有五年工作經驗同大學學位，都可以申請IO位，唔知佢呢番說話安唔安撫到AIO嘅「慌」心？