一年一度的香港體壇盛事渣打馬拉松（渣馬）明日又嚟啦，相信參賽者已作好準備，與耐力及時間競賽。近年不少藝人都愛上跑步，在社交網站經常貼上練跑流汗晒馬相，今次更由場內鬥到場外，賽事亦成為兩大運動品牌adidas及Nike的賽場，各自贊助不同藝人，壁壘分明，穿梭十公里、半馬及全馬賽道，而藝人亦磨拳擦掌，挑戰自己的目標，成績如何？明日自有分曉。
撰文：李森
註：經驗值以五個★為最高
準備指數以五個☆為最高
【十公里】起點：東區走廊 終點：維園
劉心悠帶傷慢跑
經驗值：★★★★★
準備指數：☆☆
上次賽項：十公里
今次賽項：十公里
贊助商：adidas
高登女神劉心悠今年已是第九次參賽，對場地的熟悉程度亦相對較高。不過心悠BB已經榮升CEO，因要穿梭各地工作，故賽前準備較過往幾年較差，她說：「希望今年用輕鬆心態去跑，訓練重點會放喺睡眠時間做調整，抽到時間就瞓晏覺，休息夠可以減輕心臟負擔。」因為心悠BB年中受傷患困擾，所以今次不太着重成績：「今年雙腳狀態唔好，試過拗柴，預咗會跑慢啲，不過唔會慢到兩個鐘至跑完。」
陳嘉桓練跑瘦咗
經驗值：★
準備指數：☆☆☆☆
上次賽項：首度參賽
今次賽項：十公里
贊助商：adidas
陳嘉桓（Rose）今年首度參加馬拉松的十公里賽事，她說：「我以往都係跑吓慈善活動，跑得三公里，我有跟教練學跑步，十公里大約跑一小時十五分。」Rose表示學跑後，發覺以前跑法不對，原來要練步速、呼吸及肌肉訓練，她說：「唔怪得我以前跑完步會好攰，練咗三個月人都瘦咗。」
連詩雅熱水浸腳
經驗值：★★★★★
準備指數：☆☆☆☆
上次賽項：十公里
今次賽項：十公里
贊助商：adidas
連詩雅從小不愛運動，但為了唱歌所以跑步練氣，她預期今年可以在一小時內完成，最想挑戰自己往年成績，以及能夠跑到半馬。飲食方面連詩雅向專業人士了解過，不宜突然改變一貫的餐單，她說：「最重要有充足休息，如果平時一星期跑四、五日，喺賽前一星期就唔好跑得咁密，要休息吓，或者用熱水浸腳，唔好令肌肉去得咁盡。」
李逸朗牛一出賽
經驗值：★★★★★
準備指數：☆☆☆
上次賽項：十二公里
今次賽項：十公里
贊助商：adidas
明日三十三歲牛一的李逸朗（Don）會處男在港參加十公里，他說：「我平日都鍾意跑步，兩年前喺西藏高原參加十二公里。」為了這次賽事，Don花了半個月時間操弗自己：「我估自己呢個年紀，大約五十分鐘可以完成晒成個賽事，我對自己有信心。」
少爺占最緊要靚
經驗值：★
準備指數：☆☆☆
上次賽項：十公里
今次賽項：十公里
贊助商：New Balance
少爺占是跑得之人，今年會參加十公里。第二次參賽的他笑言：「我上年冇跑，今年係第二次跑。上次跑係一個鐘頭七分鐘左右，我記得衝線時係會幫你影相嘅，我上次衝線時個樣揦埋一嚿，所以我奉勸各位，衝線時個樣要保持靚。」
【半馬】 二十一點一公里
起點：尖沙嘴彌敦道 終點：維園
張惠雅當去考試
經驗值：★★★★★
準備指數：☆☆☆
上次賽項：十公里
今次賽項：半馬
贊助商：Nike
HotCha成員張惠雅（Regen）會跑半馬，去年她在一小時四分鐘完成十公里，她表示在台灣亦曾跑過半馬，今次以兩小時三十分鐘為目標，她說：「每次都冇準備，都係放鬆去跑，屋企人當我去考試囉，朝早整個碟頭飯我食，叫我加油，跑步係要靠意志力。」
陳家樂曾傷鎖骨
經驗值：★★★★
準備指數：☆☆☆
上次賽項：十公里
今次賽項：半馬
贊助商：adidas
陳家樂以往跑的是十公里，今年他首度挑戰半馬，他說：「跑半馬係因為嗰時拍緊踩單車部戲，體能keep得唔錯，想試吓跑，不過之後整親鎖骨跑唔到冇狀態，𠵱家好緊張。」
【全馬】 四十二點一九五公里
起點：尖沙嘴彌敦道 終點：維園
Donald驚鬼巴士
經驗值：★★★
準備指數：☆☆
上次賽項：十公里
今次賽項：全馬
贊助商：Nike
商台DJ唐劍康（Donald）曾跑過兩次十公里，去參與半馬，今年更挑戰全馬，他自言目標很簡單，就是完成賽事，他搞鬼地說：「因為好驚傳說嘅鬼巴士，會接走完成唔到賽事嘅人。」他自言沒有刻意抽時間練習：「試過最遠跑三十八公里。」
丁子高隔日就操
經驗值：★★★★★
準備指數：☆☆☆☆☆
上次賽項：半馬
今次賽項：全馬
贊助商：Nike
丁子高跑齡有八年，今次首度參加全馬，他表示：「二○○七年開始參加其他賽事嘅十公里、半馬，為咗呢次比賽已準備咗一年幾，隔日就會操練，有時練十公里，有時會練二十公里，未試過練全程，已練咗一千一百公里。」丁生在半馬最佳成績是一小時五十一分鐘，自言希望在四小時完成今次全馬賽事，他笑言：「不過都知冇可能，如果抽筋都會行返嚟。」
【話你知】「肯雅徐」夠經典
渣馬成為全港、甚至國際盛事，近年更多一個買點多星睇，締造不少經典場面。徐濠縈由潮人變身「肯雅徐」，更上癮到全球各地參加馬拉松，去年成績便以三小時五十分三十四秒跑畢完成。陳冠希於二○一二年參加渣馬時被懷疑搵人頂包取消資格，被發現與選手資料不同，之後他解釋與別人換了號碼，腳上計時器可證清白。而欣宜前男友Mark Ryan戰績威水，他是二○○九及二○一一年渣馬男子組十公里跑冠軍。今年賽事由上午五時十五分開始陸續起步。
